2019年係令我明白，呢個社會係有兩種人.....
今年經歷左好多，大家都好似「就算開心，都唔好太開心，就算傷心，都唔好太傷心」，總之就起起伏伏，忐忐忑忑咁過左一年。
而今年係令我明白，呢個社會係有兩類人.....
A： 係知道呢個社會同世界係唔公平，於是努力抗爭，希望令到個世界公平返，大家都開心
B：係知道呢個社會同世界係唔公平，於是努力抗爭，希望喺呢個唔公平嘅社會中，自己拎到最大嘅jetso
咁大家經歷左一年，覺得咩人係A？咩人係B？
先講A，我諗大家都冇咩懸念，衝衝子同勇武抗爭應該係A。咁B 呢？
B 係藍絲，係喺亂世搵OT 錢嘅POPO，喺亂世撐政府撐POPO，希望終極end game 之後得到最大嘅jetso，B 係有錢人，係「呢個時勢」就算生意冇受影響，都講到自己冇得翻身，然後趁機炒人或者話要凍薪嘅BOSS。呢啲擺明奸角係B大家唔意外。
但同時B 都係沉默大多數，衝衝子爭取到會開心，爭取唔到，平時唔走到最前，生活都不至於過得太差。B 亦係「POPO 唔岩，但示威者都有錯」嘅中立撚，買哂兩邊，完美展示「男人心一字馬」......
個社會好明顯係B 多過A…
正如我話好多有錢B 人，係喺呢個不公平社會爭取最大嘅jetso，而我成日都覺得呢班有錢B 人係好怕A 人有朝一日爭取到社會公平。如果社會公平，人人都幸福，有錢B 人就會唔happy，佢地happy 就係因為呢個唔公平嘅社會有好多人唔幸福，先顯得佢地特別幸福。
總覺得好多人會感覺到，已經半年，轉做B 人係relax 好多，大家都希望做B，覺得唔好講到咁理想，爭取社會公平，先爭取自己利益先...
其實我覺得真係唔緊要，可能大家都攰，大家都失望，所以想轉做B… 但有D B 人，出嚟笑啲A人眼底手高，「爭取唔到社會公平，又唔為自己利益著想，真係兩頭唔到岸」.....
我覺得大家唔好咁啦，如果你係B ，唔好笑A 點解唔做B 啦....
我成日覺得B 就係葉念琛，笑A 想做王家衛係痴心妄想。咁我覺得有D A 人，係寜願all or nothing囉,就算做唔到王家衛，都唔想做葉念琛嘅。A 人擁有誓死唔做葉念琛嘅情操，值得respect 啦。
#做A做B係選擇
#如果你係B唔好笑A啦
Search